Të paktën 15,000 vdekje në Evropë janë të lidhura drejtpërdrejt me valët e rënda të të nxehtit që goditën kontinentin në verën e vitit 2022, sipas një vlerësimi – ende me të dhëna jo të plota – të publikuar nga Organizata Botërore e Shëndetësisë me rastin e COP27, Konferenca e OKB-së për Klimën.
Vera e vitit 2022 ishte më e nxehta e regjistruar në Kontinentin e Vjetër, duke shkaktuar rekorde të shumta të temperaturave të larta dhe zjarre me pasoja dramatike.
“Bazuar në të dhënat kombëtare tashmë të publikuara, vlerësohet se 15,000 njerëz vdiqën veçanërisht nga nxehtësia në vitin 2022”, tha drejtori i degës evropiane të OBSH-së, Hans Kluge.
Ky numër, i cili përfshin 4,500 vdekje në Gjermani, gati 4,000 në Spanjë, më shumë se 3,200 në Mbretërinë e Bashkuar dhe 1,000 në Portugali, “pritet të rritet pasi disa vende kanë raportuar një numër shumë të lartë të vdekjeve të lidhura me nxehtësinë”, tha ai.
OBSH nënvizon kështu se Instituti Francez i Statistikave, Insee, regjistroi vdekshmëri të tepërt me 11,000 vdekje në verën e vitit 2022 krahasuar me verën e vitit 2019 që i parapriu pandemisë Covid, gjë që “ndoshta” shpjegohet me nxehtësinë shumë të fortë të regjistruar konkretisht në. qershor dhe korrik.
Sipas shifrave të OBSH-së, temperaturat ekstreme janë përgjegjëse për 148,000 vdekje në Evropë gjatë 50 viteve të fundit.
Me 15,000 vdekje dhe ndoshta më shumë në një vit të vetëm, vetëm viti 2022 do të përbënte më shumë se 10% të këtij totali.
“Ndryshimet klimatike tashmë po na vrasin, por veprimet e forta sot mund të parandalojnë më shumë vdekje”, tha agjencia shëndetësore e OKB-së gjatë COP27 në Egjipt.
Sipas një raporti të Kombeve të Bashkuara të publikuar javën e kaluar, kontinenti evropian është kontinenti me ngrohjen më të shpejtë, duke regjistruar një rritje të temperaturës më shumë se dyfishin e mesatares globale gjatë tridhjetë viteve të fundit.
